Aganzallaans (live)

by Wolfgang Buck

/
1.
2.
3.
4.
5.
6.
7.
8.
9.
10.
11.
12.
13.
14.
15.
16.
17.
18.
19.
20.
21.
22.
23.

about

Wolfgang Buck, "Aganzallaans" auf der Bühne, live, ohne Netz und doppelten Boden, nur mit der Gitarre und einem aufmerksamen Publikum, mit kantigen und kauzigen Songs, schrägen Zwischenbemerkungen und Randnotizen, aufgenommen bei zwei Live-Konzerten im Frühjahr 1998 in der Katharinenruine in Nürnberg und in Lonnerstadt im Aischgrund. Die Stühle knarren, die Gitarrensaiten schnarren, man sitzt mittendrin im Live-Konzert. Und in der Magie des Augenblicks entstehen sehr persönliche Töne, und manche Songtexte gewinnen in ihrer sparsamen Verpackung an Schärfe und Zärtlichkeit, an Traurigkeit und an Witz.

credits

released September 15, 1998

Gesang und Gitarre Wolfgang Buck. Live aufgenommen 1998 in Lonnerstadt und Nürnberg-Katharinenruine. Recording und Mix Heiner Badum. Mastering Rupert Schellenberger.

tags

license

all rights reserved

about

Wolfgang Buck Bamberg, Germany

Wolfgang Buck - dialektischer Songkünstler aus Bamberg

contact / help

Contact Wolfgang Buck

Streaming and
Download help

Track Name: Ärbern (song)
ärbern

mei wegger klingld frieh umma halba fümfa
iech ziech mei hemmerd und mei husn
mei schuh und schdrümbf o
wall iech hob viel ärberd an ganzn haufm ärberd,
ohne mei ärberd iech glaab iech schderberd
sugoär wenn iech an haufm geld odder a haisla erberd
zum beischbiel vo der dande mari und vom onkl herberd
und gennerd nimmer jedn dooch af mei ärberd
iech glaab iech schderberd

iech bin ned wi di nachbern wu ned wissn wos du solln
wu in der sunna siech rumohln im swimmingpool rumdolln
und in ganzn dooch schdrohln midn urlaub brohln
und bloß asn volln immer schöbfm wolln
di wern scho nu bezohln di wern scho nu bezohln
solln mier neidisch saa af di bagasch do driem
es sin scho ganz andre hiemerdriem af der schdreckn bliem
af der schdreggn bliem af der streggn bliem hiemerdriem

mier feiern ned mier denna ärbern
mier feiern ned mier denna ärbern

mei lehm lang hob iech mei zeh zambissn
häd miech aa gern ausgruhd doch die hammer wos gschissn
hob ärbern missn mier mei kreiz verrissn
ärbern missn kreiz verrissn
wissn die ieberhabbsd af wos mier verzichd ham
wos heid alle ham däss mier des ned grichd ham

keller weissn zeh zambeissn
erbfl grohm an groll hohm
dach deggn grenz abschdeggn
gmies ohbaua grandich schaua
baam schneidn rumschdreidn
schdrassn kiern schdreid schiern
gardn gießn dooch vermiesn
zau schdreing leid ohzeing

alle rechte wolfgang buck
Track Name: Sportlerblues (song)
sportlerblues

du saxd du willsd an schboddler hasd du dier des ieberleechd
wos hasdn edz vo deim dschoogger wu zu fuß af bamberch neifeechd
und wenner nimmer schnaufm koo na zwiggder sei orschbackn zam
und er rennd nu 10 kilomeder und schdinkd dann nach schweiß däham
odder willsd du ned lieber miech wall iech hogg mid dier im risdorande
und iech drink an glann dschinzano und ess muschln sehr bikande
obber du hasd an schboddler zum freind und jammersd miech vull
wu blabbd edz di zärdlichkeid

morng kummder vielleichd mid an maundnbaik und er schdrambld si oo af der schdrass
und er kaffd si a rodlerhusn und dränierd jedn dooch fiern goddhaddbass
obber soochmers wos hasdn dervo wenner nacher dann nu weiderochsd
und drakdierd diech wi sei fohrrod gib doch zu däss du suwos ned mochsd
gib doch zu du willsd lieber miech wall iech waaß wos du gern mechersd
wall iech hob händ zum schdreichln und wenn du edz bo mier lechersd
dann machersd dei aung zu und braichersd diech nimmer frohng
wu blabbd edz di zärdlichkeid

af der lufdmadradzn in amazonas no und dees in värzer dooch
odder barfäß durch die andarkdis wallers heier a weng kälder mooch
an am fümfhunderdmeder gummiband hubfder roo vom kilimanscharo
wos willsdn mid su an kaschber der soll du wosser ned lassn koo
obber du nimm doch lieber miech wall iech du zwoär ned baraglaidn
und iech hob aa ned viel muskln obber iech kann diech gud leidn
und iech beiß aa bom küssn mei baggnzäh niemols zam
bo mier grixd di zärdlichkeid

iech schnüffl ned gern an am bodygel obber dei barfüm bedörd miech
iech schdeh af dei glanns schwarzes a schdozhelm eher schdörd miech
iech schwidz ned gern im fidnessruhm in der bodwanna scho lieber
a isostar naa des brauchi ned schampanjer is mer do lieber
und drum nimm doch lieber miech wall iech bin ned as eisn und schdohl
glabbsd du echd du brauchsd an schoddler horch iech sogs edz zum letzdn mol
aa fier diech rodl iech ned af grönland obber bo mier
do griggsd di zärdlichkeid

alle rechte wolfgang buck
Track Name: Hinder der Bühna (song)
hinder der bühna

hinder der bühna vom großn deoder
wusd is diggern vo di rechner ned heärsd
ka gschraa vo börsnschwindler kummd do hie
ka brivadfunk schdrohld gude laune aus
zwischer schbinnawehm und schdaub
do empfängd diech ka adredde hosdess
doch di dier is auf die zeid schdehd schdill
hinder der bühna

im egg lahnd a balkn as zedernholz
bleich und verwaschn i n r i
vier rosdiche nägl a older hammer
a burburmandl mid am judnschdern
der schdrigg wu sich der judas aufghängd had
a schwamm wu nuch nach essich schdinkd
a dredmina as am reisfeld in kambodscha
mid garandie und lieferschein

werd alles nimmer brauchd werd alles nimmer gschbild
will alles kaaner sehng kannsd alles nimmer bringa

fier 30 silbergroschn kannsd alles kaafm
di wärfl wus gschblld ham um sei gwand
der zrrissne vorhang asn dembl fein säuberlich
widder zamgnähd vo am kardinol
die schlofdableddn vo der marylin monroe
die gasmaskn fier di abgfohrne baardy
di dornakrona lichd af der hudablooch
dernehm af an dabledd brod und wein

lang had si kaaner mehr umgschaud do hindn
obber neili do woär anner do
die alde woär had doch ihrn fremdn reiz hadder gsachd
sind geile sachn däbei wennsders richdich blaziersd
des waschbeggn vom bontius biladus
des hadsnern ohdu und er hads gnumma
des hängd edz in sein disainerbod
und diend dem oldn gleichn zwegg

werd alles widder brauchd werd alles widder gschbld
kannsd alles widder sehng kannsd alles widder bringa
werd alles immer brauchd werd alles immer gschbild

alle rechte wolfgang buck
Track Name: Muss mer filma (song)
muß mer filma

is lehm is korz und mer vergissd su viel
und mer grichd is masde goär ned mied
wenn der bu is erschde mol afs debfla scheissd
der hisdorische momend is su schnell verbei
die weld had a rechd dässmer diesn augnbligg
fier alle zeidn dokumendierd
die woschd blumbsd in zeidlube nei in duubf
die mamma streichld froh in bumm sein kubf

solche augnbligge muss mer filma
drum kaffsd du dier ein video
familiäre schdernschdundn muss mer filma
kaaner had mer sei ruh afm klo

dei lehm kochsd du in brakdische bortiona ei
und schdellsders nei in dei vorrodsschränkla
wenn der onkl willi am sunndooch af bsuch kummt
dann grichder a weng a versucherla
wall wenndu diech ned afm bildschirm sixd
dann gibbds diech am end goär ned
du woärsd ned in venedich du bisd ned verheiräd
du bisd ned daafd und ned di drebbm rohgfluhng

wenn der oma afm leingschmaus die brodnsoß afs kosdüm drobfd filma
und a leergfressner diesch mid ohzullde buddlersbaa und grädn alles filma
und af der hochzeid in der kerch singd a kreischnder sobran so nimm denn meine hände
und dann greiners ruudzerwasser obwohls is ganze joär af di bfarrer schimpfn des muss mer filmasolche augnblicke

do kummsdu do kummsdu do kummsdu ned drumrum
muss mer filma
also, horch zu iech sooch dir edzerd amoll wos
du mussd dir umbedingd a videokamera kaafm
do kummsdu heidzudooch suwos von nicht drumrum sooch iech dir
do kummsdu heidzudooch einfach nicht mehr drumrum kummsd du do heidzudooch nicht mehr

alle rechte wolfgang buck
Track Name: Allaa fier diech (song)
allaa fier diech

do schdeh iech edz am friedhof bo deiner leich
der schnee knirschd under mei sulln es is a kalder dooch
is ganze dorf gibbd dier di ehr su wis scho immer woär
su wi sis kerd sin alle kumma allaa fier diech

ich bin ein gast auf erden so dönds as rauhe kehln
jo echd es riehrd mi oh su schee singers fier diech
schdeifgfrurn doch würdevoll haldn schwere händ di nodn
ganz su schee verdiensders ned des brauch iech dier ned sohng

es woär a weider weech doher durch a verschneide weld
der wind bfeifd immer nu su kold do af der heh wi vo zwanzich joär
iech bin scho lang nimmer do gfohrn obber iech kenn nu jedn baam
jede kurvm jeds haus jedn booch jedn zaun in dera gehngd

der bfarrer bedd an scheena vers a floggn schmilzd af sein barredd
und dann verliesder nu dei lehm di ganzn achzich joär
bloß wisdu manchn drangsalierd hasd des lassn mier heid wech
mid suwos lassmer diech in ruh af dein ledzdn gang

iech hoff du bisd edzerd do drohm su gwieß is des fei ned
in herrgodd kannsdu ned bescheißn wi di ami nachn griech bo der endnazifizierung
iech hoff dier fälld wos bessers ei an dera himmlsdier
iech hoff dier fälld wos bessers ei an dera himmlsdier

alle rechte wolfgang buck
Track Name: Zucchini (song)
zucchini

di frauen as der nachbäschafd maaners gud mid mir
und bringa mier ihre gressdn zucchini
im brinzib schdeh iech bo frauen dadsächlich af alles wos groß is
bloß ausgerechnd ned af ihre zucchini

wumid verdieni
su drümmer zucchini
bringd mer doch lieber
gelbäruhm rieber

vur zwanzich joär had nu kaaner bo uns an zucchini kennd
is hächsde des worn gurgn und worn domodn
doch dann sin alle leid nei di doskana grennd
und dodd gibbds zucchini in gnobblauch und öl gebrodn

die hams enddeggd
die ham na gschmeggd
die sin su klaa
des kenna mier aa
des kenna mier besser
wall unsre wern gresser

zucchini sin normolerweis klaa und zord und zergenna im mund
sie kidzln di zunga und lassn viel bladz im mohng
in frängische gärdn do züchdns grüne bombm mid dreizä bfund
wennsd willsd kannsd mid an zucchini dein nachbern derschlohng

mensch des sin zucchini
iech glaab edz schbinni

deidsche audo sin af der weld bekanndlich di schnellsdn
deidsche abodd di saubersdn di brofesser di hellsdn
deidscher schbass is am ernsdesdn
di schboddler di besdn und deidsche zucchini
sin einfach di allergressdn

bloß bei kondome sin di idaliener besser in form
sie ieberdreffn um drei zendimeder di euronorm

alle rechte wolfgang buck
Track Name: Elf Noma (song)
elf noma

marga loewi
geborn 15 sebdember 1931
glebbd hads in an dorf in oberfrankn
verscholln mid elf joär in izbica

di marga is di jüngsde vo elf judn as unsern dorf
di annern zeär wollmer aa ned vergessn
fanny katz geborene ullmann
gustav reichmannsdörfer
henry loewi
amalie reichmannsdörfer geborene dingfelder
siegfried liffgens
gisela liffgens geborene rosenbaum
selma loewi
luise loewenfels
lothar liffgens
joachim liffgens
glebbd hams in an dorf in oberfrankn
verscholln in minsk auschwitz odder ercherdwu

wer is draurich
wer had wos gsehng
wer had an si denkd
wer a dräna verlurn

obber bleimer bo der marga loewi
elf joär su old wi dei dochder heid is
elf joär old
asn haus rausbrülld
af der schdrass zamdriem
afm lasdwohng gschmassd
im viehwaggong lichd und lufd ohgschniedn
vo mamma und babba wechgrissn
in budn under di fieß wechzuhng
nummerierd
di hoär gscherd
di klaader wechgnumma
vergasd odder derschossn
fier exberimende hergnumma odder derschlohng
gschblld hads in an dorf in oberfrankn
verscholln in der vergessnheid

wer is draurich…

alle rechte wolfgang buck
Track Name: Wenns nach mier gehd (song)
wenns nach mier gehd

wenns nach mier gehd
wünscherd iech mein freind as afrika an friedn in sein land
wenns nach mier gehd
dann lehm serbn und kroadn und muslime widder wand an wand
wenns nach mier gehd

wenns nach mier gehd
ham kadolische bfarrer endlich scheene runde weiche frauen
und di bauern in kambodscha
kenna in ihrn minafreia agger widder reis ohbaua
wenns nach mier gehd

wenns nach mier gehd
dann wünscherd iech an jedn der wu draurich is an grund zum freia
wenns nach mier gehd
däffm alle modls suviel doddn essn bis si schbeia
wenns nach mier gehd

und wer blind is sollerd alles sehng
und wer lahm is sollerd flügl krieng

wenns nach mier gehd
hädd der olde der wu öfders an mei hausdier kummd sei eigns bedd
wenns nach mier gehd
wär di hälfde vo di naggerdn im playboy männlich old und fedd
wenns nach mier gehd

wenns nach mier gehd
wünscherd iech dem der wu duggserd in der eggn hoggd großzügichkeid
und wens eigschberrd ham wall er für andere sein mund aufgrissn had
dem wünsch iech freiheid
wenns nach mier gehd

und wer blind is sollerd alles sehng
und wer lahm is sollerd flügl krieng

wenns nach mir gehd

alle rechte wolfgang buck
Track Name: Gemmeraweng (song)
gemmeraweng

edz gemmeraweng in wold
gemmeraweng in wold
gemmeraweng in wold

gemmeraweng gemmeraweng gemmeraweng in wold

und na liengmeraweng do ...

und na wardmeraweng bis dunkl werd ...

und na demmeraweng wos scheens...

ja wu wormernaweng heid nachd ...

gell des mechersdaweng wissn ...

des verrodmerdiraweng ned rodmerdiraweng ned...

alle rechte wolfgang buck
Track Name: Is letzte Hemmerd (song)
is letzde hemmerd

wos hasdn ghabd
wenn is lichd ausgehd
wos blabbdn wennsd dein letzdn
schnabberer dusd
und wenns dann hassd hey older
worsd lang gnuuch af dera weld
etz schausd dässd weiderkummsd
do nieber

a lehm lang grennd und graffd und gschdriedn
a lehm lang gsorchd und bloochd und gärberd
a lehm lang gruderd und is gnagg eizuhng
des wors dann

is ledzde hemmerd
ziehngs dir dann o
dann fohrns numoll
middn kamm durch deine hoär
in an beddduch eigschlohng
ieber di dierschwelln naus
zum ledzdn mol gehds dann
di schdieng noo

a lehm lang grennd und graffd und gschdriedn
a lehm lang gsorchd und bloochd und gärberd
a lehm lang gruderd und is gnack eizuhng
des wors dann

alle rechte wolfgang buck
Track Name: Schaunerhie (song)
schaunerhie

schau die do wi kammern bloß mid su an feddn orsch
asu a enge husn ohziehng schaunerhie
und der erschd der bubbld in der nosn also naa
und dann frissders nu die sau also naa schaunerhie

schaunerhie...

schau der do hoggd immer in sein gaddnhaus
mid aaner flaschn schnabs also naa schaunerhie
und der erschd schiffd immer an sein zwedschgerbaam
am hellerlichdn dooch asu a saubär also naa schaunerhie

schau die do do kummd jedn dunnerschdooch a geignlehre,
wer wass wos die do dreim schaunerhie
und der erschd der wäschd fei nie sei audo
sixd den dreeg an sein schudzblech also naa schaunerhie

schaunerhie wis neirennd in di kärch mid ihrn xangbuch
die dud immer su heilich schaunerhie
und der erschd der had radzn in sein gaddn
des is ja aa a grüner also naa schaunerhie

und die doo schaunerhie die is ohgschmierd wi a ohlaggierder aamer
do blädderd ja der budz schaunerhie
und di erschd wis herschdeichd mid ihr schdögglschuh
und geh duds mid am neecher also naa schaunerhie

schaunerhie schaunerhie obber schau schnell widder wech
die braung des ja ned merkn schaunerhie
obachd edz kummers grüss godd a scheens wedder hammer heid
an scheena dooch noch herr nachber
schaunerhie

alle rechte wolfgang buck
Track Name: Iech waas ned mehr wie du (song)
iech waas ned mehr wie du

iech waas ned mehr wie du
obber iech glaab
däß unser weld siech ned vo selber drehd
däß a baby im bauch ned vo selber wächsd
däß der südwind ned vo selber wehd
iech waas ned mehr wie du
obber iech glaab

iech waas ned mehr wie du
obber iech hoff
däß der dod ned is letzde is
däß di schlächer und henker ned driumfiern
däß aaner dann di dräna ohwischd
iech waas ned mehr wie du
obber iech glaab

iech waas ned mehr wie du
obber iech sing
däß di wohrheid gsachd wern muss
däß unrechd durch maulhaldn ned besser werd
däßdi leid drodzdem liebhohm mussd
iech waas ned mehr wie du
obber iech sing

alle rechte wolfgang buck
Track Name: Schwarzer Indioner (song)
schwarzer indioner

mei schlidzaung die hob iech ned vo am deidschn
sondern vo am soldodn vom dschingis khan
mei aungbraua schaua aus wi zwaa schrubber
die sin ned vom deo waigl sondern asn iran
in mein bauch undn drin bumberd a infeggd
den hob iech mier kuld bom heimlich radioheärn
und der kummd ieber new orleans as afrika
und drum bin iech immun geecher braune lehrn

ich bin lieber a schwarzer indioner
mid aung as china rode hoär
lieber a arabischer händler
wi a reinrassich dumbfer deidscher mo

mei frängischer akzend der is fei aa ned deidsch
sondern stammd raus vom kisuaheli
a radz bodsi in der wanna und di radzi bodsi aa
ey doumoumerwosdou ouh wossamoumousa
im verdrooch schdehd in arabische zohln
mei gage wu iech mier nacherd hul
aa fiers bier worn di germana zu bleed
ohne mönch as irland sauferd iech nu an med

und du sagsd schdobb giros pizza calamari
do blabbd mier vur grausn is maul offn schdeh
des ganze gfress des is zum schbeier
iech will lieber mei glees und kann chop suey
obber glaabmers du fressersd nu hoferschlei
hädd ned domols a freindlicher indio
dem columbus an zendner ärbfl eibaggd
alles gude kummd vo draußn bloß di debbm sin zum grausn

alle rechte wolfgang buck
Track Name: Hamwärds (song)
hamwärds

vur mier griechd a rods band
schaddn huschn am schdrassnrand
leidblankn schießn an mier väbei
moonlight-sound as bayern drei
modor leffd ruich und einwandfrei
und iech bin leichd und frei und es gehd hamwärds

hinder mier zwaa gude schdund
mid gude leid wu zughorchd ham
wu gschbannd ham wos iech sohng hob wolln
und ned bloß af di gägs gwadd ham
und aa leise dön gschbierd ham
und iech bin leichd und frei und es gehd hamwärds

die nachd is durchsichdich und klor
wenn iech su schbäd durch frankn fohr
di mondsichl is a fingernogl
zeichd mier in weech ham in mein schdodl
däham ward a warms bedd af miech
und iech bin leichd und frei und es gehd hamwärds

und sie wachd auf wie worsn heid
und iech sooch gud worn gscheide leid
iech hob miech zwoär a weng verschbilld
obber machd nix des is ned su wild
sie sachd gud nachd und drehd si um
und iech bin leichd und frei und bin däham

alle rechte wolfgang buck