We’ve updated our Terms of Use to reflect our new entity name and address. You can review the changes here.
We’ve updated our Terms of Use. You can review the changes here.

Vis​ä​wie

by Wolfgang Buck

/
1.
| bsuffne männer lassn siech vo ihre nachdblindn frauen hamfohrn | kurz nach zwölfa samsdooch nachd bloß nu 50 kilomeder bis däham der mond is a fingernogl und wanderd weiß durch die baam di bundesschdrass is frei alles druggn und di sichd is hell und klor ka nebl und ka rehng ka lasder und ka reh und iech fohr obber hinder aaner kurvm kurz vur mier af amol rode lichder iech geh wech vom gas und schdeich af die brems und bin scho hindn dro a bmw x5 schleichd mid 60 durch die nächdlichn hügl er mäanderd und er bremsd und gibd gas und er bremsd und mir is kloä bsuffne männer lassn siech vo ihre nachdblindn frauen hamfohrn obwohl bsuffne männer unausschdehliche beifohrer sin bsuffne männer lassn siech vo ihre nachdblindn frauen hamfohrn aa wenn nachdblinde frauen aa im dunkln ausgeschbrochn nachdblind sin er wünschd sich an lenker und a eigns gasbedol af seiner seidn sie hädd gern an knebl odder a bedäubungsschbridzn im gebägg sie denkd su a bsuffner debb ercherdwann lass iech miech numol scheidn er schdöhnd auf und lalld hobb drügg drauf und gib gas iech kenn di schdregg er kennd di schdregg
2.
| der ding & sei woä | es glabbern seine zäh sei buggl dudnern weh es gwaggerd in sein bauch er schdehd masdns am schlauch des is der ding und sei woä der ding und sei woä es ziechd in seiner schubf es hulleind in sein kubf es bfeifd in seiner lunga es is belzi af seiner zunga in sein glumb do häld ka dübl sei hoär sin lauder schübl es rumbld in sein herzn in sein ingraisch hadder schmerzn sei griffl denna babbm sei fieß die denna knabbm es bressierd in seiner blosn es dröbfld as seiner nosn sei hoär sin widerboschdi sei gurgl is immer doschdi sei gnagg des schbierd an jedn zuuch und sei bobbmernee had a moddsdrümmer luuch er had immer schlechde kaddn sei robbern die had an bladdn an der goschn hadder a bebbm er machd fier jedn in debbm er had nie wos zum kiefm sei dachrinna die dud driefm es haudnern im huf gschdreggsderlängs hie und er lichd bridscherbraad in der dreggädn brieh als dudder bfobfern und soddern siech und sei woä lässder verloddern ercherdwann im lehm isser verkehrd ohbuhng ercherdwu isser as der kurvm nausgfluhng
3.
Visäwie 03:17
| visäwie | visäwie ham di kinner bflasder am knie und verschdeggn sich in der heggn in ihrn loocher und der nachber singd olde schloochermelodien und schnadd sellerie fier di brieh visäwie visäwie derabie is vobei schdrohld di fraa di chemo had ohgschlohng hurra kumm driggmer die dauma am besdn glei alle zwaa und sie winkd nu rieber und iech wink nieber vo visäwie nach visäwie visäwie visäwie und der junge moo mid sein schwarzn bmw der fährd schee und gibbd obachd af die kadzn wall es müssn af die schdrassn aa nu bobbycarfohrer draufbassn haislershubfer di klann biradn am kaugummiaudomodn und iech riech an sauerbrodn visäwie kummers vo der ärberd ham visäwie klobfd dä bundschbechd löcher in schdamm visäwie grüßd di bosdbodi rieber zu mir visäwie froochd der nachber wie gehdsn na dir visäwie schdeichd die kadz die wolkn näher doch fiern rüggweech brauchds di feierwehr visäwie af der schdrass kennd a jede an jedn visäwie schbield der nachber af seiner drombedn visäwie visäwie visäwie schaunerhie do radschn zwaa iech schdell mi hie hie an zaun radsch aweng mied iebern weech visäwie
4.
| viednam is vull | viednam is vull iech wass ned wu er lichd der ord iech hob ned aufbassd in der schull obber iech woä scho dodd viednam is vull brauchsd nimmer hie dailand is su vull ka bladz am swimming pool iech wass ned wu er lichd der ord iech hob ned aufbassd in der schull obber iech woä scho dodd dailand is gscheid vull brauchsd nimmer hie brauchsd nimmer hie brauchsd nimmer hie mount everest vull alles vull mid müll iech wass ned wu er lichd der ord iech hob ned aufbassd in der schull obber iech woä scho dodd everest is vull brauchsd nimmer hie brauchsd nimmer hie alles hie im urwald do gibbds leid a nei enddeggder schdamm die hamsi su arch gfreid wi mir si gfundn ham su freindli und bescheidn su offm und su unverdorm am besdn is du bsuchsders gleich wall in 10 joär brauchsd nimmer hie brauchsd nimmer hie in 10 joär is alles hie der durisd der machd hie wosser suchd indem ers find * heh aah ooh aah eeh marrakesch is vull karibik die is vull dubrovnik venedich barcelona alles vull madschu bidschu is vull serengedi die is vull brauchsd nimmer hie bloß di lufd am nordbol is su kloä su unverbrauchd und rein der schnee su weid des eis su blau der himml hoch und du su klein ah der nordbol brauchsd nimmer hie nimmer hie kollabierd infizierd und kolonialisierd nimmer hie liecheschdull swimming pool nimmer cool alles vull nimmer hie (*zitat nach hans magnus enzensberger)
5.
| iech wär dann do | iech wär dann do wenn in der nachd um zwölfa dei zuuch eifährd Iech wär dann do lod in koffer hindn nei woschd wi schwer horch dir dann zu und deil mid dir dei gwärch und dei meer iech wär dann do iech wär dann do und wegg di auf wennsdu vo gschdaldn draamsd iech wär dann do alles gud du worsd bloß im falschn brogramm iech wär dann do und hald di fesd wennsdu diech an miech hielaansd iech wär dann do iech wär dann do iech wär dann do und schür in ufm o in dera winderkäld und im summer bin i der wu dir am kärschnbaam di laddern häld und im frühling und im herbsd freimer uns an dera bundn weld iech wär dann do iech wär dann do wennsd ned blaudern willsd sondern lieber schweigsd wennsd du vur idiodn wu dir begehnga kann milimeder weichsd iech wär dann do wennsdu mir im gaddn an babblschwärmer zeigsd iech wär dann do iech kann greina und lachn kann waddn und machen hold mi zrigg lass es grachn iech wär dann do iech wär dann do doch vergesslich schlooch Hogn bin verlässlich zerbrechlich und schdark iech wär dann do iech wär dann do und koch fier diech a fesdmohl odder bloß an dee drodz hooche welln und gerumbl kumma mier iebern großn see findn dodd an bladz an lee und der see is blau und schee mier wärn dann do
6.
| ned su schnell | ned jeder wu bol aufschdehd is aa am ohmd am ziel ned jeder wu glei losrennd kummd aa dohie wu er will ned der wu an haufm dön schbilld machd aa di besde musigg ned der mid di masdn schbrüch had aa is masde glügg ey ned su schnell brichs ned iebers knie ouh mid a weng an gfühl langsam kummsd ehrer hie du mussd goär ned di größdn drümbf hom du gwinnsd drodzdem dei schbiel du mussd ned an drümmer schliedn fohrn und du kummsd drodzdem ieberoll hie du kummsd nauf af an hochn gaul wennsd du ned suviel blärrsd und du kannsd iebern rehngbuhng danzn wennsd af di wolkn heärsd
7.
| kummdmernaham | wenn iech ohmds af mein balkong hogg neber mir a fläschla wein und iech schau zum himml nauf seech di milchschdrass und in großn wohng a boär sadellidn di indernationale raumstation di nachdmaschina vo london nach dubai fliechd durchn orion drund in der Wiesn machd der igl a boä husderer und a maus flederd husch an mir vobei hallo dracula und na kummer mir su komische dinger in mein kubf wassd scho su philosophische gedankn denk iech dann bo an fläschla riesling af mein balkong nachds umma halba zwölfa zum glügg is der liebe godd ned verheiräd mid anner deudschn hausfrau sunsd budzerd die den gschbrenkldn zieberleskäs am nächdlichn himml do drohm einfach bffffff wech hullerd a weng an himmlsreinicher und mid an großn schrubber wisch und wech einfach wisch und wech des macherd die des wärs fei dann gwesn mid dera milchschdrass odder aa odder aa wenn a fliecher durchfliecherd verschdehsd sohngmeramoll a su a dreamliner wassd scho und der deedera schdreifm af ihrn frischbudzdn himml draufmachn ouh do wär wos los do wärerds fei fuchdi iech heärs scho rumbläägn kaum hobbi sauber gmachd do drohm fliechd scho widder aans quer durch kummdmernaham ihr oldn dreggsfliecher nix wi ärcher hadmer do ohm kummdmernaham nanaa zum glügg denkermer zum glügg is der liebe godd do drohm allaans schdändich des gwärch und des geduu am himml des gschmarri und des gwaaf und des gschieß und diskussiona iebers wedder nanaa des bassd scho alles
8.
Ned schborn 03:21
| ned schborn | ned schborn am lachn ned schborn an di dräna ned schborn am friedn machn ned schborn am versöhna ned schborn am kaffee und aa ned am schogglood ned schborn am lehm an der budder und an der marmelod ned schborn ned schborn wenn a armer vur deiner dier schdehd ned schborn zu begreifm wuher nern der wind wehd ob er as deiner schdadd is odder as an ferna land ned schborn am gwissn und am geld am herz und am verschdand ned schborn wenn alle kumma am brodn und am bier ned schborn bom kaddln an di drümbf und aa ned an der schmier ned schborn an der lusd ned schborn am vermissn ned schborn an der sehnsuchd und aa ned schborn am küssn wall der geiz is is draurigsde wos gibbd af dera weld er machd di gsichder hässlich und wenn der vurhang fälld dann kanner nix miednehma und naggerd musser fodd kaans wu um ihn draurich is wall er had immer gschbord ned schborn an der zuversichd ned schborn am gudn mud ned schborn am widerschdeha ned schborn an deiner wud ned schborn an komblimende ned schborn an deiner zeid ned schborn am horizond ned schborn an der zärdlichkeid
9.
| wenn af amol dei leem | wenn af amoll dei leem ned su ehm sondern voll dernehm verleffd es diech as der kurvm haud a erdbehm a flud a börsncrash odder ehm a virus a verflixder virus wussdu ned sixd obber vielleichd griggsd und dann ned durchbliggsd warumsd af amol af indensiv liggsd su a ding wosmer ned sehng kann obber krieng kann wummer nix bieng kann däss widder bassd schmassd uns as der bohn durchkreizd jedn blon ka sandschdrand ka griechnland ka resdaurand ka wäddshaus wer häld die angsd und den schmerz aus und di wud aa di kinner gehds ned gud wann isn väbei wos kummdn af uns zu wann simmern endli do wi lang dauerdsn nu und du suchsd und du suchsd nach an schuldichn des soll soford vergeh wer isn do edz schuld iech kann diech verschdeh do verlierd mancher die geduld und mancher maand däss die ganze woä verhexd is walls ihm angsd machd wall des schlichd und einfach su komblex is du willsd schnelle erlösung willsd di simble lösung und walls die ned gibbd sagsd du des gibbds ned schreisd die sin schuld mier kenna di verdächdichdn doch ich nenn kaane noma wall die sins ned naa die sins ned doch der mensch diggd asu er beschuldichd die illuminadn bilderbercher die rebdiloiden rode hoär hexn doggder und elidn überbringer der schlechdn bodschafd nimmsd du alle in hafd exberdn und viroloochn aans af die fresse di bollidigger und di lügnbresse und alle dena ihr gsichd dir scho immer in die aung schdichd und wie scho immer seid 1000 joär die judn bloß du und dei volk ihr seid di gudn jajajajaja di gudn haubdsach es gibbd di gudn und du suchsd und du findsd di schuldichn doch die sins ned na die sins ned die sins ned
10.
Verdrauen 03:14
| verdrauen | ohne verdrauen fährsd du ned mid deim audo ieber di bruggn iebern main ohne verdrauen ohne verdrauen schdeigsd du ned in den fliecher af amsderdam ei ohne verdrauen schiggsd du kaane klann menschn in die unberechnbore weld nei und ohne verdrauen ohne verdrauen beissd du ned in a brodwoschdsemml nei ohne verdrauen widdersd du hinder jeder lodndeegn aan wu diech bscheissd ohne verdrauen ohne verdrauen lebbsd du immer in der angsd däss dei ICE endgleisd ohne verdrauen schberrsd du alle dürn zu wall do draußn do wimmlds vo feind ohne verdrauen ohne verdrauen ka umarmung und kann kuss ka liebe und ka freind ohne verdrauen du lebsd ned ohne verdrauen ohne verdrauen es gehd ned ohne verdrauen ohne verdrauen schdellsd du ned an dein blummafeld a kassa zum selberzohln hie ohne verdraun des is des gschäfdsmodell fier verquere schwurbler und di verschwörungsindusdrie
11.
Schaunernoo 03:57
| schaunernoo | der umdrehde bfiffer do drund is a schdadd mid am durm fasd 100 meder hoch mier flieng rei vo zürich überoll wors schee doch edz werds nu viel mehr wie is mooch über nördlingen nieber iebers ries und dann kummä immer mehr miniadurn heggn bächle wiesn schau noo sixd mei herz do drund hobbis verlurn ooh schaunernoo ooh schaunernoo a güdderzuuch zwischer schduddgadd und nämbärch di a6 fließd grod wi a schdrom schau noo edz kummd ansbach und do hindn is münsder vo heilsbronn su klaa vo do ohm di feldweech di schdrassn und di dörfer do drundn su biecherd und su krumm und su schief di flüssle su glidzerd und di dächer su rod und di wälder und di weiher ned su dief den schbädsummerdufd vo do drundn des harz di kiefernwälder riechi bis do rauf di schwarzbeern sin väbei obber bol gibbds bfiffer in dem grüna labyrind zwischä allersbärch und lauf di weld kummd immer näher der kanol und iech seech af dem lasdkohn scho die gschäfdichn leid ned weid dävo ganz schdill di oldn schleusn im wold der kanol vom oldn ludwich do ruhd a haufm zeid schaunernoo af des land wennsdi drausd wennsd vo ohm drauf schausd is su schee schaunernoo dässders sixd wis do lichd es duuder nix su schlamberd und su schee edz 180 grod mier lehng uns in di kurvm und er fährd di räder naus mid am gwärch und schau hie ganz do hindn wus in bärch nauf gehd su schdaanich und su schdeil kummd mei vadder her vo eismannsbärch
12.
| wer do foddfährd | di sunna blinzld durch des blädderdach in mein seidla schbiechld siech des helle grün und iech schau und horch a weng di schboodzn noch wis dschilbm und um di diesch rum kondrolliern vo ercherdwu vo weidn bumbd a bloskabelln mid duba flüglhorn und klarineddn und di ringldaum die gurrn der old koodzer der dud schnurrn und di madle schnurrn und die frauen gurrn um die weddn wer do foddfährd kädd däschlohng * under su an grüna baum in mein seidla su a schaum wer do foddfährd kädd däschlohng di sunna zwinkerd durch des blädderdach in mein seidla schbiechld siech des helle grün und iech schau a weng die weichn frauen nooch wis leichdn und wi maicheriddn blühn vo ercherdwu ganz noh fliechd a warmer dufd as sandlholz und rosn und jasmin und di dräächer schbidzn raus und di hüüchl dränga raus und wos sunsd geheim is zeichdmer heid ganz kühn wer do foddfährd kädd däschlohng in mein kubf a su a draum af deiner haud a su a flaum wer do foddfährd kädd däschlohng in mein seidla su a schaum wer do foddfährd (*zitat nach tommie goerz)
13.
Hilfd nix 03:25
| hilfd nix | draussn is fei nunni hell doch der wegger schelld iech mecherd gern nu lieng und im schlof nu a weng flieng doch es hilfd nix di erschdn schridd die denna weh im bedd do wors su schee die fieß bom geh denna weh und is greiz bom schdeh doch es hilfd nix do draußn is su kold und im bedd is su schee worm wenn nix weh dud bisd ned old wenn nix weh dud bisd scho gschdorm doch es hilfd nix na na na na es hilfd nix wos saa mou mou saa di ärberd dud si ned allaa ned allaa ned allaa ned allaa drum machmer wos zu machn is demmer wos zu du is bis a ruh is wall es hilfd nix na na na na es hilfd nix mei lieblingsnation is di brograsdination hobbs nie bereid do bin iech bürger dävon hob scho an haufm zeid befreid walls iebermorng genausu langd am sankd nimmerleinsdooch do blooch iech miech goddseidank hob iech aa morng nu wos im dank wall es hilfd nix wenns ned in ledzdn drügger geberd kummerd nix ans lichd der weld dem dichder fälld scho wos ei wenns bressierd er brauchd is geld es hilfd nix na na na na es hilfd nix dou moumä wos dou gäih loumä mei rouh dou moumä nix dou bidde loumä mei rouh iech loudä ka rouh wall dou moumä wos dou dou moumä nix dou doch iech louder ka rouh wall es hilfd nix loumer mei rouh na es hilfd nix
14.
Der Kabljau 03:34
| der kabljau | wenn der kabljau winsln deed wi a dschaudschau und su schee dabsich wär wi flogge der glaa bär wemmern im adlandigg fängd wos do alles im schlebbnedz hängd wenn di alle laud schreierdn ob mier uns do nu freierdn iebern schuhbegg sein wolfsbarsch iebern mälzer sein dun und däss die seldnsdn ordn nei ins fischschdäbla grodn wenn der dunfisch a delfin wär macherd kunsdschdiggle im meer müssd ka albadros dersaufm wenn di leina nauslaufm wenns ned ohne don erschdiggerdn sondern an degg laud quiegerdn und di kamera wär däbei des geberd a gschrei
15.
Hä ? 05:44
| hä ? | babbd des babberla aa af an babbkaddong hä lichd der babba midder naggerdn madda af der schesslong hä gibbds heid baggers wall der laggl mid sei schlabbm quer durch die bodaggn sabbd hä und warum hadder kabbo bom bladdnverlehng sei kabbm af der bladdn kabbd wu kummsdn na du her däss du des ned verschdehsd wu kummsdn na du her heä fei auf wennsdmer ned gehsd baris schrabbdmer wimmers schbrichd mid an haddn bee wos isn do su schwer zu kabiern und zu verschdeh mier ham waache buchschdohm mier wolln doch kann derschießn wall midd hadde bee und hadde dee kannsd du ned freundlich grüßn ka geschebber und geglabber und geradder und schdaggaddo as unsern mund alle wörder budderwaach di silbm schee gschmierd und midnander verbundn do gibbds nix wos schbidzich und blidzerd dir die libbm aufschlidzd mier ham in blues ka geduh unser ruh wie balu schubiduh in der middn und am end vo an wodd do nehmers digge el allmächd die milch is billich der dolln ihr brilln is a kassngschdell mä schbrichd des el brälabial also zunga vur der waffl mier sohng vervielfäldichn muldimillionär hul endli dei graffl am onfang vo am word vur an vokal schbrechmers kaa wi kaa ganz einfach mier sohng kanneloni kichnschädzer keeskuhng und ham an kaddaa in der middn odder vur an er odder el wädds kaa zum gee exembl graudwiggerle glees musgaad schogglood odder bagg dein grembl haggerle beißn bobbers dud scheißn giecherla grilln ins gamberla zieln doggerla bubbm bederla in der subbm naacherla is bidder seidla halber lidder wieberle wiebm zieberle biebm a schaiferla dud dufdn a wännla is a kufdn gaggerle verschdeggn zibberle schmeggn a versucherla is weenich a debberla ka könich bobberla herzn middn waggerla scherzn suggerle quiegn a gaasla is a ziegn bresdle afm kuhng robbern werd gschuhm ins amäla die marmelod ins göschla in schogglood zum geboddsdooch a schdänderla zum dank a schdamberla dänooch a wäschdla und wos fier dei döschdla am schluss nu a kiechla und a kaffeela vielleichd a weng a busserla und dann a adela iech bin fichäland und iech simmälier als fodd in aaner dur iech hob a dechdlmechdl und iech hob a neie schiggsn in der kur edz binni bleide hobbs vermassld und mei bobbmernee is leer mei scheesn is hie und iech schdells visäwie bridscherbraad afs droddoa wus ehrd

about

das album visäwie ist als CD erhältlich unter www.wolfgang-buck.de !

credits

released September 22, 2022

wolfgang buck - gesang, gitarre, bass, banjo, drum programming
rupert schellenberger - keyboards, sound und drum programming, atmo
felix lauschus - trompete, flügelhorn, chor, additional guitar auf ned su schnell, mundharmonika, sprechstimme auf hä?
oliver saar - saxophon
stephan bohm - posaune, euphonium
david saam - akkordeon auf visäwie

alle titel komponiert und getextet von wolfgang buck
ausnahme musik von ned su schnell komponiert von rainer michel

arrangements wolfgang buck und rupert schellenberger
bläser arrangements oliver saar
chor arrangements felix lauschus

aufnahmen rupert schellenberger im ultramar labs. studio berlin akkordeon aufnahme david saam im antistadl studio bamberg
editing rupert schellenberger und wolfgang buck
mixes und mastering rupert schellenberger im ultramar labs. studio berlin

produzent wolfgang buck
coproduzent rupert schellenberger

artwork filis yücel und jan buck
foto andreas riedel

www.wolfgang-buck.de
license
all rights reserved

license

all rights reserved

tags

about

Wolfgang Buck Bamberg, Germany

Wolfgang Buck - dialektischer Songkünstler aus Bamberg

contact / help

Contact Wolfgang Buck

Streaming and
Download help

Redeem code

Report this album or account

If you like Wolfgang Buck, you may also like: