wi a hamsder in sein rod geh wos rennsdn du su rum hogg di lieber her zu mir gib amol a weng a ruh dei ärberd rennd scho ned dervo heär doch midn zabbln auf warum bisdn su nervös iech waaß du häldsd des ned aus einfach schnaufm und di zeid verdreim du maansd ohne diech leffd nix du maansd zeid muß vullgschdobfd wern und bom hoggn blonsd du scho deine iebernächsdn schridd du bisd immer in bedrieb wi a hamsder in sein rod wall wer nix dud der is faul und du schbiersd im gnagg di leid ihr gschau horch wis redn an dein grob immer blabbsd du in ihrn herz wall du alles fiern verein und di ärberd hergehm hasd und wos hasdn dann dervo wenns an kranz fier diech schbendiern glabbsd du a word is do woär wosse sohng wennsd du do undn liggsd kumm iech schenk der a glos ei drinks schee langsam mid verschdand bloß a su schmeggsd du di zeid wu der drobfm reifm muss und der dokder in widdnberch drinkd in aller ruh sei bier und is evangelium gehd derwaal um ganzn globus rum drum sei gscheid und schbald di zeid dir ned in minudn auf am end hasd dann dei lehm zerhaggd in dermine und in zohln hogg di lieber her zu mir und verschenk an wimbernschlooch dei ärberd rennd scho ned dervo einfach schnaufm und di zeid verdreim alle rechte wolfgang buck

gudgebaude menschn du schdehsd am zeidungsschdand in dem koldn silberglänzerdn land und wärsd gern su braungebrannd wi di gudgebaudn menschn am schdrand af dem zeidungscover an der wand su benedrand braungebrannd su fid for fun krafd durch freude kinderlandverschiggung zum schdrand vo ibiza odder vom ballermann su richdich braungebrannd wersd du erschd zum menschn zum gudgebaudn neia menschn mens health cosmopolitan schmiern dir bilder ins hirn barfümiern und verführn verkleisdern dir di röhrn in deim kubf mid dabednleim mit süßm klebrichn schleim und sohng edz geh heim und glaab an uns und an unsere bilder an unsre hibbm und coolen bilder mid lauder gudgebaude menschn su richdich neie gudgebaude menschn leni riefenschdahl freid sich kolossal und schreid ihr habd di Wahl und schreid wolld ihr die dodale schönheid di dodale äsdedik und alles schreid jaa jaa jaa jaa jaa jaa subbi subbi und bom wöhrl und bom c und a und aa im fensder vom karschdadd schdenna herrnmenschn mid brallem schridd bussierd s a doch nicht nur da sondern öffndlich rechdlich und brivad manchmol hard manchmol zard ganz egal überall wenich informadiv doch exblosiv daily soap liebe sünde exklusiv die rebordasche zeing dir exdra daff wos fier a schdellasche heid schdandard is deggn gnadnlos auf di blamasche vo deim körber vo deim schlechdgebaudn körber di blamasche vo deim schlechd gebaudn körber vo deim miesn schlechdgebaudn körber driumf des willns und abführbilln schaffn in gudgebaudn menschn waschbreddbauch und lange haxn brusdnibbl die in himml wachsn die überwindung der gravidation durch die schöne neie generation mid hilfe von silikon und aaner injektion as spachdlmasse wächsd di neie herrnrasse es endstehd di nation der gudgebaudn menschn die endfernung der beinlichkeid von hängebrüsdn weichm gewebe faldn und feddleibichkeid as der öffndlichkeid in di abgeschiednheid und schamhafde heimlichkeid es geschiehd die schöne neie eiszeid leni riefenstahl freid sich kolossal und schreid ihr habd di Wahl und schreid wolld ihr die dodale schönheid di dodale ästhetik und alles schreid jaa jaa jaa jaa jaa jaa subbi subbi gudgebaude menschn subbi subbi schöne neue menschn alle rechte wolfgang buck

sportlerblues du saxd du willsd an schboddler hasd du dier des ieberleechd wos hasdn edz vo deim dschoogger wu zu fuß af bamberch neifeechd und wenner nimmer schnaufm koo na zwiggder sei orschbackn zam und er rennd nu 10 kilomeder und schdinkd dann nach schweiß däham odder willsd du ned lieber miech wall iech hogg mid dier im risdorande und iech drink an glann dschinzano und ess muschln sehr bikande obber du hasd an schboddler zum freind und jammersd miech vull wu blabbd edz di zärdlichkeid morng kummder vielleichd mid an maundnbaik und er schdrambld si oo af der schdrass und er kaffd si a rodlerhusn und dränierd jedn dooch fiern goddhaddbass obber soochmers wos hasdn dervo wenner nacher dann nu weiderochsd und drakdierd diech wi sei fohrrod gib doch zu däss du suwos ned mochsd gib doch zu du willsd lieber miech wall iech waaß wos du gern mechersd wall iech hob händ zum schdreichln und wenn du edz bo mier lechersd dann machersd dei aung zu und braichersd diech nimmer frohng wu blabbd edz di zärdlichkeid af der lufdmadradzn in amazonas no und dees in värzer dooch odder barfäß durch die andarkdis wallers heier a weng kälder mooch an am fümfhunderdmeder gummiband hubfder roo vom kilimanscharo wos willsdn mid su an kaschber der soll du wosser ned lassn koo obber du nimm doch lieber miech wall iech du zwoär ned baraglaidn und iech hob aa ned viel muskln obber iech kann diech gud leidn und iech beiß aa bom küssn mei baggnzäh niemols zam bo mier grixd di zärdlichkeid iech schnüffl ned gern an am bodygel obber dei barfüm bedörd miech iech schdeh af dei glanns schwarzes a schdozhelm eher schdörd miech iech schwidz ned gern im fidnessruhm in der bodwanna scho lieber a isostar naa des brauchi ned schampanjer is mer do lieber und drum nimm doch lieber miech wall iech bin ned as eisn und schdohl glabbsd du echd du brauchsd an schoddler horch iech sogs edz zum letzdn mol a fier diech rodl iech ned af grönland obber bo mier do griggsd di zärdlichkeid alle rechte wolfgang buck

crumlin road di aan lehm in der crumlin road di annern glei dernehm die aan die wolln glücklich saa und di annern die wolln lehm die aan die denna im schdeh die annern im kniea bedn di aan di schmassn bombn und di annern ham rakedn di aan die ham a gsichd mid zwaa aung und aaner nosn und wenns a rechd viel saufm kriengs an drugg af ihrer blosn wenns geld braung denners ärbern wenns haaß werd gehns in schaddn und die annern lehm genausu und drodzdem sohngs ihr seid raddn und des woär scho wi di großvädder mid laddn afnander los sin und des is su wenn di männer a boär andre in di lufd joong und des is su wenn di junga bflasderschdaa af andre schmassn und fier all des wern di annern eich nu ihr lebdooch hassn und di aan ihre kinner lerna rechna schreim und lesn und schreim ins hefd nei mier sin gud di annern sin di bösn und di onführer kumma in di schul lassn siech fodografiern und denna kinner dädschln und unsiddlich berührn und sie sohng fiern friedn do missersd ärbern des wär ned su bequem doch wennsd a gwehr hasd bisd a held und kannsd in dooch nei lehm an schdadddeil midanander baua is fier dei kreiz ned xund doch kinner zeung und bombn lehng kann a jeder faule hund alle rechte wolfgang buck

echdzeid und der booch fließd ins dool und er schiggd si ned bsonders rennd ned schneller wie er muss af sein weech in fluss er lässd si ned ohdreim wall es kummd eh wis kummd und es gluggerd im grund und di sunnaschdrohln danzn iech sooch hey hey iech sooch huuhuuhu ned su schnell sunsd gruuvds ned iech sooch hey hey iech sooch huuhuuhu ned su schnell lahn di einfach zrigg und derwall lichd di kadz afm schdaa in der sunna und blinzld aaner schmaasmuggn hindnnooch und sie leggd si di kralln und wolzd ihrn buggl durchn sand midn bauch in di lufd oh des dud gud und drin in der schdadd hedzn drauriche gschdaldn und maana sie lehm däbei ziddern di finger und af bildschirm flimmern kurvm in echdzeid doch di echde zeid kummd vo ganz allaa alle rechte wolfgang buck

a jeder kennd an jedn mer driffd sich in der ober im foyer mer siehd sich am empfang bo der fdp mer deild im schdaddrod sich di machd mer gehd midnander af di jachd di müllverbrennung baua mier is neie schdadion gehmer dier iech liech su gern im liecheschdull am abgezweichdn swimmingpool hodde hodde hodde hüh digge klöße in der brüh wer will wos dervo däwischn der muss mid im drübn fischn fälld er in den schbendnsumbf machd der hobbereider blumbs obber wenn du denksd edz schreider hasd di deischd er reided weider awewe mani wassa njo kumi assoua lele a lele o katika mwema kwahia njoyo tikili wassi kuama mweyo les copains et les coquins ils ramassent tous les pots d`vin fatta la legge fatto l`imbroglio, ruba tu che rub`anch`io it is not what you know it is who you know unass wkremlje drusja pajot adna ruka drugu mijot ob in köln odder im swasiland im weißn haus odder im landrodsamd es is su schee af dera weld wenn der aane freind zum andern häld willsd du mid der kudschn fohrn därfsd du ned an budder schborn willsd du nehma mussd du gehm auch der andre lebd gern angenehm alle rechte wolfgang buck

10 gebote wi di sklavm as ägybdn endkumma sin di soldodn vom pharao ohne hafm im meer gschwumma sin ham di sklavm gsachd mier wolln nimmer laafm sondern fahrn und der pharao in ägybdn er gibbd nu ka ruh in sein sinn fahr mer ro af berlin do fährder pharao ned hin is volk had sich am reichsdooch gloocherd had wild debadierd wie gehdsn edz weider und der mose der schreider iech soocherd ja wos wenn miech ans froocherd af miech heärd ja kanns drum schdeichi allaans do nauf in di kubbl weid wech vom drubl bin i näher am himml am schdernenzeld an der dranszendendn weld is lernen fälld do leichder do reichder verschdand in höhere sphärn in unendliche weidn iech mooch mi ned schdreidn mid eich do undn iech muss do wos klärn 40 dooch isser bliem had gschriem und gschriem a lange zeid fier di do drundn zum waddn a lange zeid fier debaddn sie kaafm krawaddn und gründn bardeien die spd und di csu gründn rüsdungsfirmen wi di mtu mid aufsichdsrädn und lobbyisdn si gründn ig medall und baywa gründn verbände fier bazifisdn fier bauern kriegsvederanen fier indusdrie und handel fier moralischn lebenswandl inderessngrubbm und vereine große und kleine grüne schwarze gelbe und rode der mose hoggd alleine und schrabbd die 10 gebode ihr kennd eich denkn wis kummd der mose schdeichd ro vom ord der erleuchdung is volk verschdummd der mose raischberd siech und brummd die 10 gebode dobblpunkd dann liesders vur und alles is schdill und horchd zu wos godd will gor ned su vill bloß 200 wörder leichd zu merkn doch is lehm is komplex mier wolln ja ned zweifln und nix zerredn doch der deifl schdeggd ebm in jedn dedail und an jedn denkborn fall mussd bedenkn af den vordern und hindern bänkn im saal als erschder zur schdelle is der schnelle wesdermölle von den liberaln 10 gebode is uncool klingd fadal nach moral wu blabbd do der spass des muss annersch hassn mier müssn vom markd her denkn der lenknde schdaad is as der mode drum blädierd di fdp fier die 10 angebode ich bin di lobby do hobbi wos dergehng iech hogg im aufsichdsrod bo dem und dem die dantiemen sin dord angenehm des ding des schdobbi do hobbi wos dergehng du sollst nichd dödn des is an jedn kloär des is drivial mier sin ned blöd do braungmer ned redn des mach mer eh ned doch ich vermiss als zusadz zum fümfdn gebod a amnesdie für die energieindusdrie bei gehäufdn fälln von leukämie in der nähe von akws sachd der von der rwe er hoggd fier di spd an der schbree die vo aral lalln liebe leude im saal bo dankerunfall do zahl mer nix di hallallaa had a million kosd wenns eich ned bassd däss danker rosdn verschigg mers öl hold mid der posd jawoll nichdhafdung ein gudes wort außer in fälln von direkdn mord so ergreifd das word der bauernbräsidend und es is evidend direkdn mord kammer des nichd nennen benicillin im fudder von legehennen und bse im cordon bleu und ddt im schbeichersee der damm is brochn und edz wird gschbrochn sie ham lunde gerochn es wird wochn dauern und jahre is ledzde word is nu ned gschbrochn is finanzamd zum beischbiel kann nichd verhehln du sollsd nichd schdehln kammer falsch verschdeh es kann zu quereln führn mid dem bürger auch andere würger wi di bankn fanga o sich mid mose zu zankn in feierdooch heilichn do ham vur allem di eilichn kann gefalln wall aa wu annersch kannsd am sunndooch kaafm es laafm maschina rund um di uhr time is money do kanni ned am sunndooch schlofm odder bedn di konkurrenz machd des aa ned du kannsd ned an diggn mercedes benz liem und zugleich an fauln lenz schiem des gehd ned di konjunkdur brauchd effizienz brauchd durchgehend offne fabrikn dei fraa beglüggn kannsd aa in den übrichn lüggn in noma vo godd nicht missbrauchn des sohng mier auch und schdimma dem zu sachd di csu und dämid a ruh is ham mir a padend ohgmeld af des c und dämids aa ka anderer mehr verwend ham mir dem badendamd glei wos gschbend die niggn und sohng jawoll außerdem kann aa kaaner mehr onschbruch erhehm af die marke godd wall godd is vergehm an die usa die ham edz di rechde und alle andern die ihre schlechdichkeidn genausu in godds noma beschdreidn ham schlechde kaddn und missn waddn lange red kurzer sinn is gesedz vom mose is hin gehd in di hosn säufd ab in der soß wi di soldodn im meer der ehemals große wurf is am ende sehr geschrumbld und humbld schwer in di ledzdn rundn aa di bildzeidung had wos gfundn ergreifd im namen des xundn volksempfindns is word du sollst nicht lügn is mord an der wahrheid nämlich der unsrichn gefährded die freiheid der bresse drum haud dem asylschmarodzer mose auf die fresse di anderen schdaadn der eu geradn in zorn wos deddern su lang beradn vo ganz vo vorn is des scho derb verschdößd gechern weddbewerb des is doch herb du derfsd kann andern godd beaufdrohng wenn des ned fadal is fier midbewerber a qual is a illegales monobol is di ägybder versohln hädd aa a anderer godd gern gmachd vielleichd a kadolischer heilicher odder a dumpinggodd as boln hädd dem pharao sei schdreidwohng gschdohln fier wenicher kohln mid wenicher leichn is erschde gebod missder schdreichn es bleim nu vier die müssn reichn liebes bublikum damen und herrn es werd eich zu dumm des siechi eich oh der schädl brummd do kummd ja hindn nix raus die summe schdimmd hindn und vorn ned as 10 gebodn wern 4 hinweise des is doch scheiße ja schaffn dann wenigsdns die die reise bildlich gschbrochn von der quelle der erfindung bis zur schdelle der mündung im meer des geldnden rechdes liebe leid ich befürchde schlechdes es wor a langer maradon von mose bis zur eurobäischn union doch der bundesrad der freud sich schon wall do bloggierd di obbosition alle rechte wolfgang buck

mei hund der dud fei nix iech hob an liebn klann roddweiler der is masdns a langweiler er liebd alle menschn sehr er is einen meder dreissich und er denkd si gerne beiss ich in das bein vom briefdrächer bfarrer kanner a ned leidn und er beissd nern in di seidn wenner evangelisch is und bei rodfohrer und jogger isser a ned immer locker obber sunsd isser ganz süß mei hund der dud fei nix nana mei hund dud werkli nix mei hund der dud fei nix mei hund der dud fei nix nana mei hund dud werkli nix mei hund der dud fei nix er is ganz harmlos und ganz brov und is geduldich wi a schof er is a ganz verschbilde rass und wenner beissd dann bloß as schbass mei hund der dud fei nix nana mei hund dud werkli nix mei hund der dud fei nix am libsdn frissder klaane kinner die finded er im schdaddbark drinna wos kann des arme viech däfier stadd dässe sich am budn schmassn und sich schdill beschnüffln lassn schdaddessn renners glei dervo mer däff a dier ned su erschreggn und in ihm in jachddrieb weggn des is gladd dierquälerei des arme viech is su sensibl und iech nehmnern des ned übl wer werd denn glei beleidichd sei mei hund ... er maands ned bes und bringd kann um drum leffder immer frei do rum er lässd a masdns widder los es sei denn du schreisd blödzlich los dann sichder rod mei hund der dud fei nix nana mei hund dud werkli nix mei hund der dud fei nix alle rechte wolfgang buck

sambesi worsd du scho im aischgrund an am saddn frühlingsohmd hasd di sunna versinkn sehng in am wassergrohm und mid ihre ledzdn schdrohln lässds di rodn dächer lachn und di aisch schleichd faul dähie mid mindesdns zwaarahalb sachn bo am dichder lesi frangn lichd ned am meer obber leid, iech schwör frangn lichd am sambesi worsd du scho am jura drohm an am neblin dooch im schbädn joär ieber schdaaniche ägger wehd der wind is gschraa vo di kroa und der graue nieslrehng nodld dir ins gsichd und is aanzich wärdshaus had di lädn dichd es leichd mer ei frangn lichd ned am meer obber leid iech schwör frangn lichd in der mongolei worsd du scho am obern maa wenn di hidz im summer flimmerd ka lifdla gehd der zeicher schdehd die veechl singa nimmer wi a dausndfüßler in berch nauf kringld siech di brozession. di fieß sin schwer der rosngranz staabd asn megafon der lyriker besang es frangn lichd ned am meer obber leid iech schwör frangn lichd am ganges alle rechte wolfgang buck

di soß di lufd bom rewe is vull mid musikmoleküln vuller glügg su warm wi schligg doch ned su diggflüssich sondern dünn und lau du brauchsd ned rührn odder schluggn odder blosn si leffd dir nei dei nosn schbüld diech weich wi lenor an weihnachdn odder neijoär es singd bocelli der denor mid sein kinderchor dann schdehd bon jovi af der maddn verkaffd zuggerwaddn immer di gleichn bladdn bladde dexde gladde harmonien sadde brofide fier di indusdrie fier sony und bmg di kenna sich freia auch du bisd gerührd allerdings im mohng und mussd diech schbeia schdefan raab und di andern idiodn ham ihre bfodn ieberoll machn quodn der rubl rolld verkaafm scheiße fier gold hamblmänner lassns krachn drambln rum af di schwachn und alle lachn ab und haua siech vur lachn di schenkl ab die soß ieberschwemmd di ganze weld und wenn alles um uns zamfälld es is di soß wu alles zamhäld die soß si drobfd as alle ridzn si leffd dir nei in deine ohrn an dera soß do denners gwieß ned schborn si narkodisiern und euforisiern di afrodisiern und brivadisiern di schürn hysderie mid scheinbroblemen wi maul und klauenseuche lamendiern der schbrid is zu deier denn breis müssder senkn um abzulenkn vo di wichdichn demen sie schenkn dir erlösung von der mühe des denkns wos klima ozon bevölkerungsexplosion wos is des schon gecher den flobb vo inderschobb gecher dax und nemax fuchzich wos habdern der wedderberichd fier morng is doch lusdich dank kachlmann doch iech sogs eich fiers joär 2050 heärd er sich nimmer zum lachn an du schausd cnn sixd den bräsidend er häld a red die fohna wehd helm ab zum gebed des badriodismus die händ vo di leid afm herz die hörner und schdreicher klinga die leid di singa godd schüdze amerika das land der vier soßn heinz ketchup hollywood erdöl und cola in dosn doch iech will ned läsdern wall mier sin brüder und schwesdern und drodz falschm bados und wesdern denk ich an gesdern an dschääß und an freiheid drum seid ihr geachded doch kaaner had den liebn godd gebachded drum hassd mei moddo godd schüdze das broddokoll von kyoto und seinen namen vur der medamorfose in domadnsoße amen alle rechte wolfgang buck

ned su laud kannsd du nu heärn wenn der wind durch die schilfschbidzn schdreichld und wi des flirrd wenn di mauerseechler um mauern seechln heärsders nu gurgln wenn wasser as felsn leffd und wi a eidechs durchs gros huschd an haaße dooch schbilld ned su laud ned su laud schbilld ned goär su laud ihr werd nu duusheäräd bo dem gwärch ganz furchbor duusheäräd schbilld ned su laud ned su laud ned su laud wennsd vuur dein haus wennsd aane hasd af der bänk hoggsd heärsd du dann nu wi vo weidn a greissähng kreischd und wi di bierflaschn klimbern wenn abgfülld werd heärsd du di ruh wenn grod ka audo durchs dorf quiedschd heärsd du des rassln vo di keddn im schdall heärsd di zwaa gieger wu jeder is ledzde word hom will wassd du wis klingd wenn bom nachbärn a sau gschdochn werd wi in der kichn is fedd vo di wäschd in der bfanna schbridzd und wenns dann ohmd werd kannsd du heärn wi des dorf eischläffd wie klingd der reißverschluß vo ihrn rodn klaad heärsd du di nägl vo deine finger af ihre nylonschdrümbf und wenns ganz leis dir wos scheens in dei ohr neihauchd alle rechte wolfgang buck